如風相遇如風傳揚
- Alvi, AC Elements
- 24 hours ago
- 4 min read
我很喜歡浦公英，感覺教學就像浦公英一樣。散播出去的種子不知會到哪個方向，就好像教導的學生不知會成長到哪兒！而偶爾有一些學生能讓自己也成長起來，就像種子再次回到自己身邊一樣。
上年我認識了一位學員，他曾跟其他老師學習身心靈的課程，然後輾轉又來我這裡完成了直傳靈氣課程。自從學習以來，他偶爾也會跟我聯絡，聊聊一些案例，問問可以如何處理更好。除了感謝他對我的尊重外，我在他身上也感受到幫助別人的真心與熱誠，老實說，在這世道上並不容易🙏也很多謝他仔細的分享，讓更多人可以看到直傳靈氣的幫助與應用之處。
🤭
✨️✨️
ALVI MISS
由我完成你教嘅進階課程之後，對於直傳靈氣嘅運用真係更加有信心。連我太太都已經慢慢習慣咗，就算身體冇乜唔舒服，佢都會想我每晚幫佢做下治療。我通常集中幫佢做頭同頸，佢都覺得好受用，一來睡眠明顯好咗，二來面部皮膚都變得紅潤又有光澤。
第一次做完靈氣之後去做美容，美容師都問太太點解皮膚好咗咁多，太太又如實講我點幫佢做治療。之後太太再見美容師，佢一眼就睇得出太太有冇持續做直傳靈氣，所以連美容師都跟咗你學。
又有試過佢忽然肚唔舒服想嘔，完全講唔到嘢，起唔到身。我用直傳靈氣為佢做胃部，冇耐之後，佢嘅唔舒服慢慢減退，之後直頭好似冇晒事咁。佢當然覺得好神奇，我就更加開心，因為可以幫到屋企人。
至於遠隔方面，我真係試過好多次好不可思議嘅時間吻合同反應。唔單止我自己覺得神奇，我啲朋友都覺得好驚訝，例如：
案例1
朋友媽媽髖關節痛，我做遠隔冇幾耐，朋友就WhatsApp我，問我係咪做緊。我答：「係呀。」佢即刻回覆：「媽媽忽然唔痛啦。」
案例2
朋友隻貓後腳行唔到，我就提出俾我試下做遠隔。第二日朋友問我係咪做咗，我答：「係呀。」之後佢send返條片俾我，見到隻貓自己行出廳飲水。佢好開心，我都覺得特別開心。
案例3
有位朋友早前急病入院，需要急救，之後身體都未完全恢復。我主動同佢太太講，不如俾我試下做直傳靈氣。有一晚我做完之後通知佢太太，佢問返我時間，原來啱啱就係佢先生感覺到心口有反應嘅時候。
其實仲有好多例子。對我嚟講，喺學習嘅路上，直傳靈氣係最直接、亦都最有回響嘅一種。不單止幫到受者，連我自己都會有得益。我一直好記得你教學時講過：當我哋為別人做直傳靈氣，其實同時都會為自己做清理，唔會帶走對方任何「負能量」。呢一點令我好安心，亦都成為我一直堅持幫人同修行嘅一個好大支持。
當然，身邊仍然有唔少朋友對直傳靈氣或者其他非醫學、科學嘅方法抱懷疑態度。我自己就覺得，只要時機到，大家自然會慢慢明白當中嘅價值。所以都有唔少朋友親身體驗過之後，就主動搵ALVI報名學習，每次聽到我都覺得好感動、好開心。
最後，真心多謝你一路以來用心嘅教導同分享，令我可以一步一步建立信心，同時喺幫助別人嘅過程中，亦不斷提升自己。直傳靈氣對我嚟講，已經唔只係一種學習，更加成為我生活入面一個好重要嘅部分。未來我都會繼續用心練習同累積經驗，希望可以將呢份正面嘅能量帶俾身邊更多人，同時亦期待有機會再次向你學習，不斷精進。
✨️✨️
這位同學還說： 你話係我身上學習, 我真係唔覺, 但我一直有回想跟你學習既情境, 好多謝你。更要講, 你真係好似唔使瞓咁, 幾時都會覆同學既問題, 哈
🤣🤣
其實有時我的確在同學身上學習不少。有些同學鍥有而不捨的學習精神，令我也需要研究下才可以仔細回答。有些同學問的問題很罕見，開拓左我新的回答方式與認知。有些同學呢，佢地嘅馬虎同忘失是在訓練我自己的耐心。有些同學因為身體與動物的情況也陪養我自己的同理心。（的確我也有做得不夠好的時候，我都會提醒自己你今次又處理不好了）
而在你身上，我也學習與提醒自己助人的初心🩷說實話，可以寫這麽多字都要不少心機，你如此記得你的承諾而且認真完成，也是應該要跟你學習的🙏
至於唔洗訓。。。。好多同學仔都甘同我講，我只可說有些事情是生活會給你訓練🤣
感謝大家閱讀全文
不枉同學一場心機
靈氣是輔助療法 不能取替正統醫療
Comments