動物傳心：17歲的囡囡故事分享
今次個案分享的每一字一句都完全是由客戶寫給我，她的分享非常仔細，真的很感謝您這麽用心思寫下她的貓貓與動物傳心的故事！
囡囡，一隻17歲貓女，平時都係精靈活潑，吃喝玩樂，休息去廁所都冇問題嘅貓貓。完全冇諗過，只不過係每年一次嘅身體檢查，發現其中一隻眼仔唔識得遇光收縮，做咗一個眼壓測試，滴過眼藥水3次之後，身體健康情況出現變化。
一晚連嘔8次，之後唔飲唔食冇去廁所，全身冇力，情況實在令人非常擔心。半夜時分亦都即時帶囡囡去24小時動物醫院再做檢查。期間做咗更多嘅身體測試，例如blood test, ultrasound 等, 結果一齊都好正常。最後獸醫開出胃藥+止痛藥，希望可以幫助囡囡止嘔及任何身體痛楚。由於囡囡唔肯自己進食及飲水，所以只可以force feed, 盡量餵到幾多就幾多。但係囡囡不停反抗。亦因為長假期嘅關係，我哋要等多一日先可以帶囡囡去睇番自己睇開嘅獸醫診所。
係完全冇頭緒可以點樣幫助囡囡嘅時候，我就想起Alvi，試下可以可以用傳心方法嘗試同囡囡溝通對話，希望可以知道究竟囡囡依家身體係邊度有唔舒服。
得到Alvi 嘅幫助，知道原來囡囡身體仍然可能有麻醉藥未散嘅情況，而令到囡囡好想嘔，所以唔肯進食。亦因為向咁短時間見咗多位醫生而產生咗恐懼感。知道咗係呢個情況後，當我哋再次見獸醫時，經過商量後就決定幫囡囡吊鹽水，除咗因為缺水外，亦都可以清理體內剩餘嘅麻醉藥。期間亦再一次做blood test, x-ray 等檢查，亦都冇發現有任何身體問題。
第一日吊完鹽水後再見番囡囡，已經感覺到佢比之前好咗好多，返到屋企即時自己去廁所大小便。稍作休息一陣後亦肯自己飲水及進食少少，雖然水同食物都係要遞到去囡囡面前先食。但係肯自己食已經係進步咗一大步。第二日繼續吊鹽水，當夠鐘接番囡囡時，我好肯定囡囡係好番晒，因為佢已經不停咁喵喵叫，不停咁鬧我哋啦。但係嗰一刻嘅心情係好開心。囡囡冇事啦。
同醫生再傾番問題所在，醫生認為係stress 同埋麻醉藥未過而產生。亦都叫我哋暫時唔好再滴眼藥水。等囡囡回復正常之後，先再考慮去唔去睇眼科。
今次事件再次令我更加相信，動物傳心係有一定嘅幫助。只要動物肯溝通同表達到，原來真係可以搵到答案。但係當然有病嘅時候係需要去睇醫生尋求幫助。最後要多謝Alvi 百忙中抽空幫囡囡做傳心。好多謝你嘅專業同幫忙。
5.7.2024
以上
願大家和樂安康！
Alvi, AC Elements
We love animals, animals love the world. And the world loves us!
Comments